REMATANDO MARZO CON MÁIS NOVAS NO OBSERVATORIO DE NUBES

Bo día pequenos e pequenas meteorólogas!

Volveu o frío! Esta primavera quérenos enganar, porque incluso volveu a caer neve en lugares altos! 

Esta neve caída nesta época denomínase nalgunhas zonas a Neve do cuco, deixovos aquí unha pequena reseña disto:

 A neve de primavera coñécese polos veciños de Negueira de Muñiz (Lugo) como a "neve do cuco" xa que tras os primeiros cantos desta ave soen chegar días fríos, nos que deixa de cantar e mesmo pode nevar.
Unha vez que soben as temperaturas, o cuco volve a cantar. Ademais, tras pasar a "neve do cuco", aínda queda a "neve da rá".
[Texto de Xabier Moure Salgado. Setembro de 2013]

 

 Dende logo que a meteoroloxía é ben curiosa :)

Dito isto, poderedes comprobar na anterior publicación do observatorio de nubes, a incógnita resolta de que era aquilo que vían os autores das anteriores fotos de nubes, desta volta houbo varias coincidencias! O realmente interesante, foi ver que lonxe pode chegar a nosa imaxinación e que ideas tan variopintas sairon!

Co cal, aquí volvemos con máis nubes que nos fostedes enviando durante estes días pasados de sol (non esquezades compartir con nós a que vos recordan nos comentarios na parte inferior, é moi divertido volver á imaxe e intentar atopar aquilo que o outro imaxina), clícade no enlace para velas:

1. NUBE DE ASIER 

2. NUBE DE SERGIO 

3. NUBE DE LIDIA 

4. NUBE DE MARA 

5. NUBE DE ALEXIS 

6. NUBE DE EMILLY 

 Temos nubes de todo tipo, pero estes días apareceron especialmente cúmulos, debido ao bo tempo, á pouca humidade e movemento de aire vertical que houbo nestes días pasados.

Animádevos a seguir enviándonos nubes. Son unha xanela máis, que nos permite ver ao exterior, ao mesmo tempo que o seu aspecto sedoso e cálido, transmite calma e paz.

Unha aperta de nube!

IMOS DESVELAR A INCÓGNITA QUE ESCONDÍAN AS NUBES
1. A nube de Asier era un ratiño.
2. Sergio díxonos que a súa era un paxaro.
3. Lidia enviábanos o que para ela era un León!
4. Houbo pleno acordo que Mara vía un corazón.
5. Alexis atopaba unha foca.
6. E Emilly unha serpe!

Grazas por participar!