ACTIVIDADES DA BIBLIOTECA: ESCAPE ROOM E CHISTÍN

Na xornada de hoxe a biblioteca de Modestina tivo moito movemento: Escape Room i entrega de premios de Chistín.

En primeiro lugar visitounos Iria, unha gran profesional que nos levou ao mundo dos Escape Room. A clase de 3º e 4º tivo a oportunidade de descifrar diferentes códigos sobre o San Xoán. Fixérono ás mil marabillas para ser quen de abrir todos os candados!

Logo foi a quenda dos maiores do centro, que investigaron moito para conseguir descifrar unha receita de chocolate saudable. Por suposto, houbo que probala!!!

Ademais, o tradicional concurso de Chistín tivo a súa entrega de premios. Houbo unha gran participación e todos levaron un pequeno agasallo. Pero desta volta, os agraciados coa ansiada taza do noso dragón preferido foron Leo e Clarís (ambos de 3º e 4º), que resolveron todas as probas á perfección!

SAÍDA FIN DE CURSO ÁS FRAGAS DO EUME E PRAIA DE CABANAS

A pasada semana tivemos a saída de final de curso de todo o centro. Unha xornada moi completa onde puidemos aprender moito sobre a fauna e flora do Parque Natural das Fragas do Eume, en primeiro lugar no centro de interpretación e, a continuación, no propio parque. A segunda foi a experiencia máis produtiva porque, ademais de pegar unha boa camiñada, desfrutamos dunha entorna espectacular que temos ben pretiño da casa.

Ao rematar, cansos e famentos, fomos cara o Pinar de Cabanas, onde comimos e xogamos na area da praia. Ademais houbo tempo de mollar os pés para referescarnos un pouco.

PEDROSO 2026

Esta semana tivemos aos maiores do noso cole na súa tradicional excursión con pernocta a Pedroso. Foron tres días cheos de divertidas actividades, bailes, xogos e, sobre todo, emocións.

Levan a mochila cargada de lembranzas bonitas das que seguro se acordarán anos. Ademais, este ano foi especial, pois compartimos lugar e vivencias cos nosos/as amigos/as do CEIP VIRXE DO MAR de Narón. Outro grupo de 11 rapaces cos cales fixeron moi boas migas e fixaron unha amizade que esperemos dure toda a vida.

Toca tamén agradecer ao pedazo equipo de monitoras que estiveron con nós, Tempus Educa demostrou unha vez máis que teñen un gran valor humano. Majo, María, Uxía, Lachi, Saray, Yahy... xa ides no corazón modestino!

Deixamos un vídeo que seguro vos gustará!

RETO CHAMORRO 2026

Durante as pasadas semanas recibimos un vídeo dos nosos amigos do centro Asociación Nuestra Señora de Chamorro. No mesmo puidemos ver as caras dos usuarios dese centro, entre eles a nosa exalumna Lara, a cal nos fixo moita ilusión ver de novo. O vídeo era unha seria convidación a realizar o seu último reto.

Non é un reto sinxelo, aínda que si moi divertido! Desta volta tocaba xogar en equipo a unha proposta deseñada i elaborada polo alumnado do seu centro. Por suposto, aceptamos novamente o reto!!!

Querede ver como se xoga con ese material tan chulo que nos regalaron? Pois mirade o vídeo!!!

MOITÍSIMAS GRAZAS CHAMORRO POR CONTAR CON NÓS UN ANO MÁIS!!!

TORNEO FÚTBOL 3X3

Durante as pasadas semanas estivemos a facer no centro un torneo de fútbol 3x3. Houbo unha elevadísima participación e pasámolo xenial!

Desenvolveuse un torneo de infantil, cun empate entre os dous equipos participantes.

E outro en primaria, cun total de 9 equipos. Foron moitos os partidos e moi interesantes. Pero finalmente fíxose coa victoria o E.F. IRMANDIÑOS de Sergio, Éric i Erin.

Parabéns a todos os equipos pola deportividade demostrada durante o campionato.

CONVIVENCIA POR LETRAS GALEGAS

Para celebrar o Día das Letras Galegas fixemos unha convivencia cos centros de A Barqueira e Somozas.

Desde ben cediño pola mañá compartimos unha gran xornada. Creamos dúas alfombras florais, un maio vertical, cadros con flores e xogamos a xogos populares. Por suposto houbo tempo para compartir un bo recreo e unha merendola ben rica.

Como colofón final, o grupo de 5º e 6º ofreceu un mini concerto de frauta, tocando "Na beira do mar" e o Himno Galego, o cal acompañamos todo o mundo cantando.

Queremos felicitar á rapazada dos tres coles o seu bo comportamento e disposición para pasalo pipa!

E, como non, agradecer aos centros de O MARBÁN E A BARQUEIRA por asistir e polos regalos!

NOVOS PODCAST NA RADIO 23

Deixamos dúas novas producións do alumnado do centro para a Radio 23.

AUDIOCONTOS LINGUA GALEGA

Na materia de Lingua Galega estivemos a traballar os contos. Ademais de redactalos, tamén quixemos gravalos en audio para que todo o mundo os poida escoitar.

Deixamos enlace ao programa deste curso da nosa canle de Radio 23, onde os podedes escoitar. Iso e moitos podcast máis!

RADIO 23 CURSO 25-26

CROS AS PONTES

Un ano máis participamos con XOGADE na modalidade de Cros. De novo, tocaba visitar As Pontes para correr unha pequena distancia con nenas e nenos doutros centros da comarca.

A xornada desenvolveuse cun ambiente moi bo e un traballo duro por parte dos nosos/as no campo a través. Felicitar a todo o alumnado, pois todos/as completaron a carreira sen grandes dificultades, salientando a clasificación para a seguinte rolda de Leo e Gael, que seguro deixarán o pavillón modestino ben alto na fase intercomarcal!

Deixamos algunha fotiño desta deportiva mañá:

FOTOS

RCP NA AULA

HUGO XA É UN CHICO MAIOR E SABE PERFECTAMENTE CAL É O NÚMERO DE EMERXENCIAS, QUEREDES SABER POR QUE?

Durante estas dúas semanas, as clase de EF foron algo especiais. Dentro dos contidos curriculares toca traballar a saúde. O primeiros auxilios son un tema de vital importancia e, no noso centro, consideramos fundamental traballalos desde os 3 anos.

Grazas ao material cedido polo CFR de Ferrol levamos a cabo unhas interesantes sesións onde aprendemos a:

• Valorar se unha persoa está consciente ou non.
• Determinar se respira.
• Chamar ao 112 pedindo axuda.

Estas tres cousas témolas dominadas dende infantil. En 1º e 2º, ademais, aprendemos e practicamos moito todo o anterior e:

• Colocar unha vítima en posición lateral de seguridade.
• Técnica de RCP.
• Actuar ante un atragoamento.

De 3º en adiante profundizamos algo máis e traballamos:

• DESA: activalo e poñelo en práctica. Da mesma maneira comprobamos como saber onde temos o máis cercano coa app do SERGAS.
• Protocolo COMPLETO de Soporte Vital Básico.

Por suposto, as profes tamén nos formamos neste ámbito, para ter todos os coñecementos e ogallá non ter que usalos nunca.

Seguiremos ano tras ano incidindo nun tema tan importante como este. Deixamos algunha fotiño do ben que o fixo a rapazada!

CONSUMO RESPONSABLE

O pasado venres tivemos a oportunidade de contar no cole co Instituto Galego de Consumo. Da man de Paula aprendemos sobre produtos, obrigas e dereitos que temos os consumidores.

Ademais fixemos un xogo para comprobar as nosas aprendizaxes.

Grazas Paula!

DÍA DE ROSALÍA

O pasado 23 de febreiro celebramos no cole o Día de Rosalía de Castro.

Na biblioteca do centro puidemos desfrutar dunha sesión moi especial, "Poesía con moito conto", da man de Marisa, actividade que nos traslada o Concello de Moeche.

Ademais, durante días previos, o alumnado estivo traballando acerca da figura máis representativa da nosa lingua. Aquí vos deixamos unha mostra:

• Vídeo poema "Negra sombra"
• Podcasts na Radio 23

O UNIVERSO: INVESTIGAMOS UN POUCO MÁIS...

Na materia de Ciencias Sociais tocou traballar sobre un tema como é o universo. Nesta ocasión propuxemos unha actividade para profundizar un pouco máis. Eliximos tema, investigamos, producimos unha maqueta e un mural e logo tocou contalo!

Existe unha exposición no corredor da entrada onde podedes ver todas as producións!

Aquí vos deixamos as distintas propostas!

ABRIL AS NOVAS: UN XORNAL DOS HISTÓRIC@S 10.0

"Abril as novas" é un pequeno proxecto de Lingua Galega onde a rapazada de 5º e 6º elaborou un xornal que recollía diversas noticias ficticias sobre o noso centro educativo. Desaparición de profesores, segredos misteriosos ou un divertido "xamonazo" son algúns dos sucesos que ocorren neste centro.

Queredes saber máis? Pois podedes ver a versión en papel no corredor de arriba ou ben escoitar as audionovas que vos ofrecen a continuación:

A CAÍDA DE LUPE A CAÍDA DE MANOLA A DESAPARICIÓN DE ÓSCAR A PANTASMA DO COLEXIO A PELEXA A SUBSTITUTA A TIXOLA MISTERIOSA DE LUPE ALUMNOS ROYALE CONCURSO DE CHISTES DATCHBALL A CAÍDA DO COLEXIO NOTICIA ALMUDENA SEGREDO MESTRE ABEL UNHA CABRA NO DESPACHO XAMONAZO AO PROFE ABEL

TRABALLO SOBRE O ENTROIDO!

Durante as xornadas previas á festa do Entroido, a alumnado estivo a traballar sobre o Entroido galego. Investigación, traballo da información i exposición oral sobre a nosa cultura.

TORNEO DATCHBALL 2026

Hai uns días que rematou o torneo de Datchball deste curso. O Datchball é un deporte alternativo que causa moito furor no noso centro. Combina lanzamento, axilidade e traballo en equipo. O campionato tivo gran acollida.

Todos os equipos fixeron un gran papel, pero foron "OS SIMIOS" quenes conseguiron facerse co título.

PARABÉNS pola deportividade amosada!

DÍA DA RADIO 2026

O 13 de febreiro é o Día da Radio, desde a rede de radios escolares propoñían que participaramos neste día ofrecendo un programa no cal déramos lugar a pensar sobre a importancia da radio nas nosas vidas.

O grupo de 5º e 6º creou un podcast orixinal no que imaxinaron que un grupo de invasores chamados "Larries" atacaban o noso planeta. O único medio de comunicación que aguantou este ataque foi Radio 23... como cres que continuará?

CHARLA PLAN DIRECTOR SOBRE MEDIOAMBIENTE

O pasado venres tivemos unha nova charla, dentro do programa "Plan Director", coa Garda Civil. Unha vez máis veu a nosa amiga Sara a falarnos sobre o seu traballo. Nesta ocasión sobre as diferentes accións que realiza un departamento tan importante coma o Seprona.

Falamos sobre a reciclaxe, os incendios forestais e, sobre todo, de concienciación. No noso comportamento está a clave de preservar o medio ambiente.

Grazas Sara por ensinarnos tanto!

FESTIVAL DE NADAL 2025

Unha data moi especial para a nosa comunidade educativa, sen dúbida. Hoxe traemos todas as actuacións en vídeo para que podades volver a velas as veces que queirades.

Queremos agradecer a todas as persoas que viñeron desfrutar con nós desta especial xornada. Ademais de agradecer enormemente a quen axudou nas labores de montaxe, desmontaxe e gravación. GRAZAS!

BOAS FESTAS E FELIZ ANINOVO!!!

1.- LLEGÓ LA NAVIDAD (BAILE INFANTIL)

2.- HOXE NO BAUTIZO (TEATRO 5º E 6º)

3.- FIND YOUR OWN MUSIC (TEATRO EN INGLÉS 3º E 4º)

4.- NA BEIRA DO MAR (FRAUTA) + AO RITMO DE MOZART (PERCUSIÓN CORPORAL 5º E 6º)

5.- I WANT TO BE AN ELF (BAILE EN INGLÉS 1º E 2º)

6.- DESATINOS NA AULA DE DON CONSTANTINO (TEATRO 3º E 4º)

7.- SNOWMAN (BAILE EN INGLÉS INFANTIL)

8.- NADAL NA GRANXA (TEATRO 1º E 2º)

9.- FRIENDS (TEATRO EN INGLÉS 5º E 6º)

10.- CAMPÁS DE NADAL (CANCIÓN 1º E 2º)

11.- UNHA VELLA TIÑA NUN CAN (TEATRO MUSICAL 3º E 4º)

12.- BEDENDEN UYONA (PERCUSIÓN CORPORAL 3º E 4º)

PROGRAMA FESTIVAL DE NADAL 2025

Boas familias!

Deixamos un listado das actuacións que ten preparadas a rapazada para este prometedor festival. Van con un horario orientativo que intentaremos cumprir, pero entendendo que con nenos/as é difícil ser exactos. Pregamos puntualidade na entrada das familias para non interromper as actuacións.

Grazas por adiantado a toda a comunidade pola vosa participación!