ACTIVIDADES DA BIBLIOTECA: ESCAPE ROOM E CHISTÍN

Na xornada de hoxe a biblioteca de Modestina tivo moito movemento: Escape Room i entrega de premios de Chistín.

En primeiro lugar visitounos Iria, unha gran profesional que nos levou ao mundo dos Escape Room. A clase de 3º e 4º tivo a oportunidade de descifrar diferentes códigos sobre o San Xoán. Fixérono ás mil marabillas para ser quen de abrir todos os candados!

Logo foi a quenda dos maiores do centro, que investigaron moito para conseguir descifrar unha receita de chocolate saudable. Por suposto, houbo que probala!!!

Ademais, o tradicional concurso de Chistín tivo a súa entrega de premios. Houbo unha gran participación e todos levaron un pequeno agasallo. Pero desta volta, os agraciados coa ansiada taza do noso dragón preferido foron Leo e Clarís (ambos de 3º e 4º), que resolveron todas as probas á perfección!

DESCUBRIMOS O FONDO MARIÑO GALEGO CON 13 GRAOS

Onte tivemos a sorte de gozar dun obradoiro moi especial coa empresa 13 Graos, dedicada á exploración do fondo mariño das costas galegas. Foi unha experiencia moi interesante na que aprendemos moito sobre a riqueza natural que agochan os nosos mares.

Durante a actividade, explicáronnos as diferentes especies de animais e plantas que habitan nas costas de Galicia, descubrindo a gran biodiversidade mariña que temos tan preto. Tamén nos falaron dos perigos aos que se enfrontan actualmente os océanos, como a contaminación, o cambio climático ou a sobreexplotación dos recursos mariños.

Despois da charla, realizamos un obradoiro de debuxo no que os nenos e nenas pintaron con acuarelas distintos animais do fondo mariño galego, deixando voar a súa imaxinación e creatividade.

Ademais, gozamos dunha incrible experiencia inmersiva grazas a unhas gafas de realidade aumentada, coas que puidemos facer unha viaxe virtual polo océano galego e sentirnos como auténticos exploradores mariños.

Sen dúbida, foi unha xornada educativa, divertida e moi enriquecedora que nos axudou a valorar aínda máis a importancia de coidar os nosos mares.

NOVOS PODCAST NA RADIO 23

Deixamos dúas novas producións do alumnado do centro para a Radio 23.

CORRENDO POLA IGUALDADE

O venres antes de irnos de vacacións, tivemos a sorte de contar cunha actividade moi especial: un contacontos da man de M de Manuela, centrado na reflexión sobre os estereotipos de xénero e na presenza do machismo na nosa realidade cotiá. A través de historias e dinámicas participativas, o alumnado puido cuestionar roles tradicionais e tomar conciencia da importancia da igualdade.

Como peche da actividade, os nenos e nenas de infantil organizaron unha “volta ao cole” correndo, nun xesto simbólico inspirado na Maratón de Boston. Esta carreira ten un significado moi especial na historia do deporte, xa que en 1967 Kathrine Switzer converteuse na primeira muller en correr oficialmente esta proba, abrindo camiño para moitas outras.

TENDAL DAS PALABRAS

 

Xa estamos preparados e preparadas para recibir o sol e a primavera co noso tendal de palabras en galego. Cada unha delas leva consigo o seu significado e tamén un anaquiño de nós, acompañado dunha imaxe que a fai aínda máis especial. Así, o noso tendal converteuse nun espazo cheo de luz, alegría e creatividade, perfecto para dar a benvida a esta estación tan fermosa.

A primavera xa está aquí… e nós celebrámola con palabras en galego!

CONTACONTO CON MIGALLAS

Hoxe tivemos no colexio unha sesión moi especial de contacontos da compañía de teatro Migallas Teatro. Foi unha mañá moi divertida na que todo o alumnado, profesorado e familias participamos con moita atención e entusiasmo. As historias, cheas de ritmo e humor, fixeron que todos e todas pasásemos un rato moi agradable.

Como sempre,  Migallas non defrauda e conseguiu que gozásemos moito desta actividade tan especial. Agardamos poder volver gozar pronto doutra das súas actuacións! 

ABRIL AS NOVAS: UN XORNAL DOS HISTÓRIC@S 10.0

"Abril as novas" é un pequeno proxecto de Lingua Galega onde a rapazada de 5º e 6º elaborou un xornal que recollía diversas noticias ficticias sobre o noso centro educativo. Desaparición de profesores, segredos misteriosos ou un divertido "xamonazo" son algúns dos sucesos que ocorren neste centro.

Queredes saber máis? Pois podedes ver a versión en papel no corredor de arriba ou ben escoitar as audionovas que vos ofrecen a continuación:

A CAÍDA DE LUPE A CAÍDA DE MANOLA A DESAPARICIÓN DE ÓSCAR A PANTASMA DO COLEXIO A PELEXA A SUBSTITUTA A TIXOLA MISTERIOSA DE LUPE ALUMNOS ROYALE CONCURSO DE CHISTES DATCHBALL A CAÍDA DO COLEXIO NOTICIA ALMUDENA SEGREDO MESTRE ABEL UNHA CABRA NO DESPACHO XAMONAZO AO PROFE ABEL

ENTROIDO 2026

AS PROPOSTAS DE MODESTINA PARA GOZAR DO NADAL

 Boas modestinas e modestinos! Chegamos a última proposta deste calendario tan especial. 

Tendo en conta o éxito dunha das propostas, aquí vai a de mañá... 

Moitas grazas a todas e todos por participar e por facer da biblioteca un espazo tan agradable no que rir, vivir e compartir tempo e experiencias xuntos e xuntas. 

Moitos besos e que teñades unhas festas moi felices!

Modestina. 

Algunhas fotos da proposta de hoxe escribíndolle os nosos desexos a Modestina. 

AS PROPOSTAS DE MODESTINA PARA GOZAR DO NADAL

 Boas rapazada!

Aquí tedes a proposta de mañá, espero que teñades ganas de mover o esqueleto!

Deixo aquí algunhas fotos e vídeo da proposta de hoxe. 

AS PROPOSTAS DE MODESTINA PARA GOZAR DO NADAL

Ola rapazada! 

Xa temos a proposta de Modestina para mañá. Agardo que voltedes con moitas ganas de pásalo ben estes últimos días de cole antes das vacacións de Nadal. Vémonos mañá na biblio!

Aquí deixo algunhas fotos e vídeos da proposta do contacontos. 

POLO SAN MARTIÑO PEÓNS AO CAMIÑO!

Polo San Martiño, peóns ao camiño!!! Así berramos tódolos anos por estas datas para celebrar o Día do Peón no cole. Un curso máis trouxemos as nosas buxainas ao centro para xogar un pouco con elas e recuperar este xogo propio da nosa cultura e tradición. Deixamos un vídeo para que vexades algunha imaxe...

MOITO TALENTO NA ESCOLA

Esta semana tivemos, voluntariamente, exhibición de talentos. É que as nosas nenas e nenos non deixan de sorprendernos...

Deixamos un vídeo con propostas como: a mostra dun tren feito por Uxío en Proxecto Competencial, os cadros de Éric, piano con Alexis, Estela e Asier, tambor con Breo e Paula; e, por último, baile con Briana, Breo e Paula.

O LOBO FELIZ!

Hoxe tivemos a sorte de contar no cole con Miguel Guido, un artista polifacético que fixo cantar e bailar ao público modestino ao son das súas cancións. Todo isto cun fío condutor do conto escrito por el "O lobo feliz", que narra as aventuras dun lobo que non quería ser feroz.

DE ROSALÍA ÁS CANTAREIRAS

Hoxe na biblioteca de Modestina tivemos a oportunidade de desfrutar dunha marabillosa actividade titulada "De Rosalía ás cantareiras". Zeltia, de "A xanela do Maxín" foi a encargada de facer que o alumnado emprendese unha viaxe desde o 17 de maio de 1863 ata hoxe. Na mesma repasamos a todas aquelas mulleres que foron protagonistas polo Día das Nosas Letras.

Rosalía, Xela Arias, Luísa Villalta... e cantareiras como As Cantareiras de Mens, Fillas de Cassandra e mesmo as Tanxugueiras foron as protagonistas desta xornada.

Gustounos tanto que ao rematar decidimos saír ao patio a tocar a pandeireta, cantar e bailar!

Moitas grazas a Zeltia pola súa labor e ao Concello de Moeche por facelo posible.

CONTACONTOS MADE IN FEITO NA CASA!

 Esta semana está sendo moi movida na nosa biblioteca!

O luns comezamos visualizando os booktrailers que fixeron os maiores, onde nos recomendaron lecturas moi interesantes como "Pete the cat" ou "Supertato".

Acto seguido comezou o tempo de contar contos, que tanto nos gusta. O primeiro foi "Chocolata", narrado por Valeria e interpretado por Carolina, Julia e Josué facendo da protagonista.

E despois tocou unha pequena sorpresa, pois as alumnas de 6º, Oihane e Candela, deixaron a todos abraiados coa narración e interpretación do conto "Plumi", que narra as mil e unha aventuras dun pingüín. Finalizaron a historia cun pequeno concerto no cal podía participar todo o alumnado que quixera! 

P.D. Curráronse esta actividade nos seus tempos de lecer para regalarllo aos compis en fin de curso!

Booktrailers!

 Pois rematamos as clases de inglés con dous Booktrailers como recomendacións para ler no verán...

Enjoy your vacation!!!

PETE THE CAT, elaborado polo alumnado de 5º de primaria

SUPERTATO, elaborado polo alumnado de 6º de primaria.

FINAL DO PROXECTO SOBRE A IDADE MEDIA!: VENTOEIRO Nº 31

Na xornada de onte vivimos unha marabillosa experiencia que cerra o proxecto conxunto co CEIP de A Barqueira. Nós coa Idade Media i eles/as cos castros iniciamos unha viaxe aló por outubro que rematou na área recreativa do Castro, en Cerdido.

O alumnado de ambos centros, e coas familias presentes, realizaron unha exposición do traballo de todo un ano. Para todas aquelas persoas que non puidestes asistir, aquí vos deixamos o enlace para ver toda a presentación enteira, sen os vídeos cortados. 

Xa sabedes, collede flocos de millo, sofá, e a disfrutar de tooooodo o contido sen cortes!

CLIC PARA VER A PRESENTACIÓN

Cerrado por vacacións!

Un curso máis chega o momento que máis triste nos pon...o peche da biblioteca. Chega o verán e aínda que queremos descansar, votarei de menos a vosa presenza na miña casa que tanta vida lle dades.

Este ano, o peche será doblemente especial, non só por recordar todas as aventuras vividas ao longo deste curso, senón tamén pola presentación do voso libro "Modestina na Idade Media",  dando un formato diferente ao noso VENTOEIRO na súa XXXI edición.

Espero que esta andaina a disfrutárades tanto coma min...e por suposto que non será a última.

E recordade ler algún libro este verán porque libro pechado...TEMPO TIRADO!

A vosa querida Modestina

Se queredes ler esta gran aventura...

Libro "Modestina na Idade Media"