Ola a todas e todos!
Hoxe tivemos as nosas lecturas compartidas de Nadal e foron todo un éxito, estivemos ao quentiño coas nosas mantas e moi comodamente cos nosos coxíns e peluches. Ademais, Efrén, Abraham, Niko, Teo e Valeria dramatizaron o conto de ''A historia dos bonobos con lentes'',foron moi profesionais e fixérono moi ben, moitas grazas!
Velaquí vai a proposta para mañá:
.png)
Ola rapazada!!!
Moitas grazas por participar no taller de adornos de Nadal de hoxe! Estou moi feliz e orgullosa porque estiven escoitando a moitos nenos e nenas falar en galego, que ledicia!
Velaquí vai a proposta para mañá, non esquezades as mantas, os coxíns ou os peluches! Agárdovos na biblio,
Modestina.
A pasada semana rematou o torneo de Colpbol que estivemos a facer nos recreos durante o mes de novembro. Primeiro aprendemos moito sobre este divertido deporte alternativo nas clases de Educación Física e logo convocamos un torneo.
Foron moitos os alumnos/as que se quixeron apuntar e, tras unha liguiña, a clasificación resultou ser:
1.- TELETUBBIES
2.- POLOS EN SALSA
3.- 67
4.- LOS VIEJOS
Na gran final impúxose na tanda de penaltis o conxunto de "Os Teletubbies" grazas a un golazo de Paula a Adrián.
Parabéns a todos os equipos pola deportividade e ganas!
Ola modestinas e modestinos!
Aquí vai a segunda proposta de actividade. Espero que a gocedes tanto como a primeira. Moitas grazas por vir a biblio a pasalo xenial xuntos e xuntas!
Hoxe vivimos unha xornada especial no Concello de Moeche xa que participamos no Pleno Infantil organizado para celebrar o Día dos Dereitos da Infancia. Adrián, o noso compañeiro de sexto leu o manifesto que elaboraron no CLIA e que levaron ao Parlamento de Galicia. Ademais, o alumnado de quinto e sexto, en representación de todo o alumnando do cole, compartiu o kit de supervivencia no ámbito dixital. Un conxunto de consellos, reflexións e boas prácticas para navegar na rede e usar a tecnoloxía con seguridade, respecto e responsabilidade.
É fundamental recoñecer e poñer en valor a participación dos nenos e nenas na sociedade, para que poidan compartir as súas opinións que son claras, sinceras e cheas de sentido común!
Radio 23 volve a abrir as súas portas para que escoitedes os mellores podcast de toda a volta. E faino cunha ocasión moi especial, a celebración do Día dos Dereitos da Infancia.
Para iso asistimos ao Concello de Moeche a un pleno infantil onde expoñeremos as nosas conclusións sobre os dereitos das nenas e nenos no ámbito dixital. Para vivir neste mundo e que se respecten os nosos dereitos temos que elaborar un kit de supervivencia, pero... que meteríades nel? Polas diferentes clases do cole fomos recollendo información que vos ofrecemos neste programa de radio!
Ola familias. Dende a Asociación Ecuestre do 23 de abril, recibimos esta información que vos enviamos para animarvos a participar neste concurso.
Hoxe no cole recibimos a visita dun biólogo e mestre composteiro que, ademais de ensinarnos a elaborar o noso propio compost, compartiu con nós datos moi importantes sobre os residuos que xeramos os seres humanos. Falamos, entre outras cousas, do esgotamento dos recursos naturais do planeta e tamén da formación de illas de lixo nos océanos debido aos residuos que desbotamos. Foi unha charla tan interesante como preocupante, que nos lembra a importancia de implicarnos e facer un consumo responsable.
O pasado martes os nenos e nenas de Educación Infantil e de 1º e 2º de Educación Primaria fomos de excursión e pasámolo en grande.
Primeiro, asistimos á fundación ABANCA. Alí desfrutamos da exposición fotográfica de Tim Flach, un fotógrafo que viaxou por todo o mundo sacando fotos aos animais en perigo de extinción. Así, percorremos a exposición baixo a premisa de buscar solucións para protexer a todos aqueles animales que íbamos visitando.
Despois de atopar as diferentes solucións para a súa protección e de tapar a tartaruga mascota da exposición para que puidese descansar, pasamos a unha sala para realizar un obradoiro moi pintoresco. Aquí puxemos en marcha toda a nosa creatividade, pintando a uns axolotes e o seu hábitat.
Por último, dirixímonos ao Auditorio de Narón para desfrutar da obra teatral titulada "Travesía Unicornio", unha obra interpretada pola compañía Ghazafelhos baseada na historia homónima de María Canosa. Coma sempre, as risas estiveron asegurada e volvimos ao cole co corazón ben cheíño de experiencias.
O alumnado de 3º, 4º, 5º e 6º de primaria achegouse o día de hoxe ata o Concello de Oleiros para desfrutar dunha mañá ao aire libre na Costa de Dexo, un espazo catalogado como Monumento Natural e espazo protexido polo seu gran valor ambiental.
Quedamos abraiados pola fermosura das vistas, da paisaxe e de todos os elementos que a conforman.
Vimos o famoso illote de A Marola ("Quen pasou a Marola, pasou a mar toda"), as furnas, o seixo branco, pegadas de raposo, can e cabalo, etc. Ademais, atopamos especies animais e vexetais características deste lugar, como as barbas do demo, a flor do azafrán, distintos tipos de cogomelos, a herba de namorar... Ata tivemos a oportunidade de ver un numeroso grupo de golfiños nadando en conxunto!
Moitas grazas aos biólogos do CEIDA por guiarnos e por todas as explicacións tan interesantes que nos ofreceron.
Pinchade na imaxe para ver máis fotos deste día.
.jpg)
Un ano máis, o grupo de 5º e 6º configuraron o nome do cal vai ser o seu equipo. Un ano máis tiraron de creatividade e puxéronse "Históric@s 10.0".
Teñen a súa propia canle Youtube, e aínda que xa hai tempo que traballan nela (xa temos vídeos de este ano) aínda non se presentaran oficialmente. Podedes seguir os seus traballos, potenciando o proxecto de centro "Escoita que che conto" en Youtube.com/historicosmoeche.
Eles mesmos subirán vídeos sobre os seus traballos, de propia creación i edición.
Deixamos enlace co vídeo de presentación onde explican un pouco de que vai:
Tíralle da Lingua é un certame de relato oral proposto pola Asociación Pedagóxica Galega que este ano celebra a edición XXIV. O alumnado de 5º e 6º participou presentando relatos orais inventados por eles/as de xeito libre.
A única norma era facer unha contada en galego. Fixeron 5 grupos i estas foron as súas propostas!
Polo San Martiño, peóns ao camiño!!! Así berramos tódolos anos por estas datas para celebrar o Día do Peón no cole. Un curso máis trouxemos as nosas buxainas ao centro para xogar un pouco con elas e recuperar este xogo propio da nosa cultura e tradición. Deixamos un vídeo para que vexades algunha imaxe...
A semana pasada, o alumnado de 1º, 2º, 3º e 4º de primaria presentou na biblioteca do cole a Gran Gala dos Contos Modestinos, un proxecto realizado con moito esforzo e ilusión, que ademais foi envidado ao XV Certame de Curtas da Asociación Pedagóxica Galega.
Tivemos a sorte de contar coa visita de Pepablo e Montse, que se achegaron á biblioteca para ver o resultado xunto cos demais cursos. Un dos contos representados foi "Lúa", escrito por Pepablo.
Agardamos que vos guste!
Hoxe o noso alumnado puido gozar dun fermoso contacontos titulado Nanai da China da compañía Pérez&Fernández, unha obra chea de maxia que combina títeres, efectos visuais e acompañamento musical para crear unha experiencia única.
A través dunha historia divertida e entrañable, o espectáculo invitounos a reflexionar sobre as supersticións e a mala sorte, pero tamén sobre o amor dentro da familia.
Foi unha mañá chea de fantasía e aprendizaxes. Agardamos poder repetir moi pronto!
Hoxe, o alumnado de 5º e 6º tiveron a oportunidade de pasar unha mañá de ciencia no CIS (Centro de Innovación e Servicios da Tecnoloxía) de Ferrol.
No mesmo, Javier e Santiago foron os encargados de dirixir dous obradoiros moi dinámicos e divertidos onde aprendemos moito sobre os diferentes tipos de enerxía e a electricidade. Todo a través de sinxelos experimentos que quedarán gravados na memoria da rapazada.
Hoxe o alumnado de 5º e 6º de Educación Primaria do noso colexio, xunto co alumnado do CEIP A Barqueira, realizou unha excursión moi especial a Santiago de Compostela para visitar dúas das institucións máis importantes da nosa comunidade: a Xunta de Galicia e o Parlamento Galego.
Na Xunta puidemos coñecer diferentes espacios do edificio, entre eles a sala onde se reúnen os conselleiros e conselleiras e tamén a sala na que comparten e debaten propostas os secretarios e secretarias xerais. Foi moi interesante descubrir como se organiza o goberno galego e que funcións ten cada unha destas figuras.
Despois desprazámonos ao Parlamento de Galicia, onde tivemos a sorte de presenciar un pleno en directo. Durante a sesión, os deputados e deputadas debatían temas de gran importancia para todos os galegos e as galegas, como a vivienda e a sanidade.
Foi unha xornada chea de aprendizaxe e experiencias novas, que nos axudou a entender mellor como funciona a nosa comunidade e a importancia da participación democrática.
Hoxe no CEIP San Ramón vivimos unha xornada moi especial coa celebración do Samaín.
Pola mañá, na primeira hora, o alumnado converteuse en auténticos actores e actrices para representar pequenas dramatizacións de historias terroríficas. Apareceron personaxes máxicos e misteriosos da nosa tradición como demiños, a Coca, a Santa Compaña, os biosbardos e moitos máis que puxeron os pelos de punta a todo o mundo! Despois todos e todas puidemos ver os vídeos das dramatizacións na biblioteca, gozando de novo cos sustos e as risas.
Despois da merenda, chegaron as familias e xuntos decoramos cabazas, comemos castañas e compartimos momentos moi especiais entre música, bailes e moita diversión. Para poñer o broche final, celebrouse a entrega de premios do Samaín.
Bailamos, comemos e decoramos, convertendo este día nun recordo inesquecible. Feliz Samaín a todos e todas!
Hoxe no cole tivemos un obradoiro moi divertido e interesante sobre alimentos. Aprendemos moitas cousas novas sobre o que comemos cada día e descubrimos algúns segredos que non coñeciamos!
Unha das cousas que máis nos chamou a atención foi saber que non todo o azucre é igual: o que vén nos sobres non é o mesmo que o que teñen de forma natural os alimentos. Ademais, aprendemos que o azucre é como a gasolina para o noso cerebro, xa que nos dá enerxía para pensar e aprender mellor.
Tamén fixemos un experimento con zume de col lombarda, co que puidemos descubrir se un líquido é ácido ou non. A col lombarda reacciona cos líquidos segundo a súa acidez e cambia de cor, algo que nos encantou ver en directo!
Por último, realizamos outro experimento con iodo, no que botamos unhas pingas a diferentes vexetais. Sabemos que cando o iodo se mestura con alimentos que conteñen almidón( como a pataca, fariñas, cereais, algunhas froitas..), estes vólvense de cor negra. A sorpresa chegou cando vimos que tamén as salchichas se transformaban, porque un dos seus ingredientes principais é… A pataca!
Foi unha xornada chea de aprendizaxes, experimentos e moita curiosidade. Agora sabemos un pouquiño máis sobre o que comemos e a importancia de coñecer ben os alimentos que chegan ao noso prato.
.png)
