CONCURSO POSTAIS DE NADAL- ASOCIACIÓN ECUESTRE 23 DE ABRIL

 Ola familias. Dende a Asociación Ecuestre do 23 de abril, recibimos esta información que vos enviamos para animarvos a participar neste concurso.

APRENDEMOS A ELABORAR O NOSO PROPIO COMPOST E LEMBRAMOS A IMPORTANCIA DUN CONSUMO RESPONSABLE

Hoxe no cole recibimos a visita dun biólogo e mestre composteiro que, ademais de ensinarnos a elaborar o noso propio compost, compartiu con nós datos moi importantes sobre os residuos que xeramos os seres humanos. Falamos, entre outras cousas, do esgotamento dos recursos naturais do planeta e tamén da formación de illas de lixo nos océanos debido aos residuos que desbotamos. Foi unha charla tan interesante como preocupante, que nos lembra a importancia de implicarnos e facer un consumo responsable.

SIMULACRO DE INCENDIOS

 Hoxe no noso colexio realizamos un simulacro de emerxencia no que participou o corpo de bombeiros e bombeiras de Ortigueira. Despois do exercicio, deixáronnos subir ao camión e explicáronnos a maquinaria e os instrumentos que empregan no seu traballo diario. Para rematar, tivemos a oportunidade de probar a mangueira e aprender un pouco máis sobre como actúan ante unha emerxencia. Moitas grazas aos profesionais que estiveron hoxe con nós no cole!

SAÍDA A FERROL E NARÓN.

 O pasado martes os nenos e nenas de Educación Infantil e de 1º e 2º de Educación Primaria fomos de excursión e pasámolo en grande.

Primeiro, asistimos á fundación ABANCA. Alí desfrutamos da exposición fotográfica de Tim Flach, un fotógrafo que viaxou por todo o mundo sacando fotos aos animais en perigo de extinción. Así, percorremos a exposición baixo a premisa de buscar solucións para protexer a todos aqueles animales que íbamos visitando. 

Despois de atopar as diferentes solucións para a súa protección e de tapar a tartaruga mascota da exposición para que puidese descansar, pasamos a unha sala para realizar un obradoiro moi pintoresco. Aquí puxemos en marcha toda a nosa creatividade, pintando a uns axolotes e o seu hábitat.

Por último, dirixímonos ao Auditorio de Narón para desfrutar da obra teatral titulada "Travesía Unicornio", unha obra interpretada pola compañía Ghazafelhos baseada na historia homónima de María Canosa. Coma sempre, as risas estiveron asegurada e volvimos ao cole co corazón ben cheíño de experiencias.

O resto das fotos da xornada podedes velas AQUÍ

SAÍDA Á COSTA DE DEXO

    O alumnado de 3º, 4º, 5º e 6º de primaria achegouse o día de hoxe ata o Concello de Oleiros para desfrutar dunha mañá ao aire libre na Costa de Dexo, un espazo catalogado como Monumento Natural e espazo protexido polo seu gran valor ambiental.

Quedamos abraiados pola fermosura das vistas, da paisaxe e de todos os elementos que a conforman.

Vimos o famoso illote de A Marola ("Quen pasou a Marola, pasou a mar toda"), as furnas, o seixo branco, pegadas de raposo, can e cabalo, etc. Ademais, atopamos especies animais e vexetais características deste lugar, como as barbas do demo, a flor do azafrán, distintos tipos de cogomelos, a herba de namorar...  Ata tivemos a oportunidade de ver un numeroso grupo de golfiños nadando en conxunto!

Moitas grazas aos biólogos do CEIDA por guiarnos e por todas as explicacións tan interesantes que nos ofreceron.

Pinchade na imaxe para ver máis fotos deste día.

25N DÍA INTERNACIONAL DA ELIMINACIÓN DA VIOLENCIA CONTRA A MULLER

 

Onte, 25N, celebramos no centro o Día Internacional contra a Violencia de Xénero. Contamos coa visita da alcaldesa, que foi a encargada de entregar os diplomas e premios aos lemas gañadores deste ano. Para rematar a xornada, gozamos dun fermoso contacontos titulado “Mulleres de Pedra” de María da Pontragha, que nos fixo rir e bailar pero tamén reflexionar,  e aprender a través das súas historias.

Pincha aquí para ver máis fotos e videos do 25N.

CANLE YOUTUBE HISTÓRIC@S 10.0

Un ano máis, o grupo de 5º e 6º configuraron o nome do cal vai ser o seu equipo. Un ano máis tiraron de creatividade e puxéronse "Históric@s 10.0". 

Teñen a súa propia canle Youtube, e aínda que xa hai tempo que traballan nela (xa temos vídeos de este ano) aínda non se presentaran oficialmente. Podedes seguir os seus traballos, potenciando o proxecto de centro "Escoita que che conto" en Youtube.com/historicosmoeche.

Eles mesmos subirán vídeos sobre os seus traballos, de propia creación i edición.

Deixamos enlace co vídeo de presentación onde explican un pouco de que vai:

TÍRALLE DA LINGUA!

Tíralle da Lingua é un certame de relato oral proposto pola Asociación Pedagóxica Galega que este ano celebra a edición XXIV. O alumnado de 5º e 6º participou presentando relatos orais inventados por eles/as de xeito libre. 

A única norma era facer unha contada en galego. Fixeron 5 grupos i estas foron as súas propostas!

POLO SAN MARTIÑO PEÓNS AO CAMIÑO!

Polo San Martiño, peóns ao camiño!!! Así berramos tódolos anos por estas datas para celebrar o Día do Peón no cole. Un curso máis trouxemos as nosas buxainas ao centro para xogar un pouco con elas e recuperar este xogo propio da nosa cultura e tradición. Deixamos un vídeo para que vexades algunha imaxe...

Gran Gala dos Contos Modestinos 2025

 A semana pasada, o alumnado de 1º, 2º, 3º e 4º de primaria presentou na biblioteca do cole a Gran Gala dos Contos Modestinos, un proxecto realizado con moito esforzo e ilusión, que ademais foi envidado ao XV Certame de Curtas da Asociación Pedagóxica Galega.

Tivemos a sorte de contar coa visita de Pepablo e Montse, que se achegaron á biblioteca para ver o resultado xunto cos demais cursos. Un dos contos representados foi "Lúa", escrito por Pepablo.

Agardamos que vos guste!

NANAI DA CHINA, CONTACONTOS

 Hoxe o noso alumnado puido gozar dun fermoso contacontos titulado Nanai da China da compañía Pérez&Fernández, unha obra chea de maxia que combina títeres, efectos visuais e acompañamento musical para crear unha experiencia única.
A través dunha historia divertida e entrañable, o espectáculo invitounos a reflexionar sobre as supersticións e a mala sorte, pero tamén sobre o amor dentro da familia. 
Foi unha mañá  chea de fantasía e aprendizaxes. Agardamos poder repetir moi pronto!

ESTO BAILASE ASÍ!!!

AS NENAS E NENOS DE INFANTIL PARTICIPAMOS NO V CERTAME COREOGRAFÍATE DA ASOCIACIÓN PEDAGÓXICA. 

Para esta ocasión eleximos o tema de Uxía Lambona e a Banda Molona: Esto bailase así! 

 

ENERXÍA I ELECETRICIDADE NO CIS

Hoxe, o alumnado de 5º e 6º tiveron a oportunidade de pasar unha mañá de ciencia no CIS (Centro de Innovación e Servicios da Tecnoloxía) de Ferrol.

No mesmo, Javier e Santiago foron os encargados de dirixir dous obradoiros moi dinámicos e divertidos onde aprendemos moito sobre os diferentes tipos de enerxía e a electricidade. Todo a través de sinxelos experimentos que quedarán gravados na memoria da rapazada.

Coñecemos o xerador de enerxía Van de Graff, ademais de probalos coas nosas propias mans. Tamén creamos circuítos onde acendíamos diferentes leds, bombillas, placas solares e incluso cosntruímos un con tres limóns!

Tras unha boa merenda, era a quenda de falar sobre electricidade. Comprobamos como montar un robot pintor con material de refugallo e un pequeno motor.

Aprendemos moito e pasámolo xenial! Moitas grazas!

VISITA Á XUNTA DE GALICIA E PARLAMENTO GALEGO

 

Hoxe o alumnado de 5º e 6º de Educación Primaria do noso colexio, xunto co alumnado do CEIP A Barqueira, realizou unha excursión moi especial a Santiago de Compostela para visitar dúas das institucións máis importantes da nosa comunidade: a Xunta de Galicia e o Parlamento Galego.

Na Xunta puidemos coñecer diferentes espacios do edificio, entre eles a sala onde se reúnen os conselleiros e conselleiras e tamén a sala na que comparten e debaten propostas os secretarios e secretarias xerais. Foi moi interesante descubrir como se organiza o goberno galego e que funcións ten cada unha destas figuras.

Despois desprazámonos ao Parlamento de Galicia, onde tivemos a sorte de presenciar un pleno en directo. Durante a sesión, os deputados e deputadas debatían temas de gran importancia para todos os galegos e as galegas, como a vivienda e a sanidade.

Foi unha xornada chea de aprendizaxe e experiencias novas, que nos axudou a entender mellor como funciona a nosa comunidade e a importancia da participación democrática.